Бухоронинг тарихий ҳудудида электроскутер ва электросамокатлардан фойдаланиш чекланади
Янги тартиб 2026 йил 1 октябрдан кучга киради.
Бухоро шаҳрининг тарихий қисмида электроскутер, электросамокат ва айрим бошқа индивидуал ҳаракатланиш воситаларидан фойдаланишга чеклов жорий этилади. Янги тартиб 2026 йил 1 октябрдан кучга киради. Тегишли қарор Бухоро шаҳар ҳокими томонидан қабул қилинган.
Чеклов Арк қўрғонидан Пойи Калон ансамбли, Ҳақиқат кўчаси бўйлаб Лаби Ҳовуз ансамблигача бўлган ҳудудда амал қилади.
Мазкур ҳудудда электроскутер ва электросамокатлардан ташқари рикша, мопед, тўрт ғилдиракли велосипед, картинг, шунингдек, от ва туяда ҳаракатланиш ҳам чекланади.
Қарорда ушбу ҳудудда йўловчи ташиш талабларига жавоб бермайдиган ва хавф туғдириши мумкин бўлган транспорт воситалари сони кескин ошгани қайд этилган. Бу ҳолат сайёҳлар ва экскурсантларнинг хавфсиз ҳаракатланишига хавф туғдираётгани, шунингдек, пиёдаларнинг жароҳатланишига сабаб бўлаётгани таъкидланган.
Масъул ташкилотларга чеклов амал қиладиган ҳудуднинг кириш ва чиқиш жойларига тегишли ахборот кўрсаткичлари ва йўл белгиларини ўрнатиш топширилган. Шунингдек, ҳудудда фаолият юритувчи жисмоний ва юридик шахсларни янги тартиб ҳақида олдиндан хабардор қилиш белгиланган.
Мазкур воситаларда хизмат кўрсатувчи ёки фаолият юритувчи ўзини ўзи банд қилган фуқароларга эса Янги Ўзбекистон боғи ёки Боқий Бухоро боғи каби махсус ҳудудларда белгиланган тартибда хизмат кўрсатиш имконияти тушунтирилади.
