Ҳиндистон ва Бангладеш фуқароларини ОТМларга қабул қилмаслик бўйича кўрсатма берилдими?

Олий таълим, фан ва инновациялар вазирлиги давлат ва нодавлат олий таълим ташкилотларига Ҳиндистон ҳамда Бангладеш фуқароларини талабаликка қабул қилмаслик бўйича оғзаки кўрсатма бергани ҳақида тарқалган хабарлар рад этилди.

 

Вазирлик маълумотига кўра, жорий ўқув йилидан бошлаб хорижлик абитуриентларни Ўзбекистондаги олий таълим ташкилотларига қабул қилиш жараёни «Study in Uzbekistan» ягона электрон платформаси орқали амалга оширилмоқда.

 

Платформа орқали хорижлик абитуриентлар Ўзбекистондаги олий таълим ташкилотлари, таълим дастурлари, қабул шартлари ва тўловлар ҳақида маълумот олиши, ҳужжатларини электрон тарзда топшириши ва ариза ҳолатини кузатиши мумкин.

 

Вазирликнинг қайд этишича, янги тизим хорижлик абитуриентлар учун қабул жараёнини очиқ ва шаффоф қилиш, уларни воситачиларга боғлиқ ҳолатдан чиқариш ҳамда олий таълим ташкилотлари билан тўғридан-тўғри мулоқот қилиш имконини беришга қаратилган. Платформада рўйхатдан ўтиш бепул.

 

Шунингдек, вазирлик Ўзбекистон хорижий талабалар оқимини чеклашдан эмас, уни кенгайтиришдан манфаатдорлигини маълум қилди. Бунда хорижий талабалар географиясини кенгайтириш ва таълим экспортини ривожлантириш мақсад қилинган.

 

Хорижий талабаларни қабул қилиш ҳажми эса ҳар бир олий таълим ташкилотининг имкониятларидан келиб чиқиб белгиланади. Бунда ўқув аудиториялари, лаборатория базаси, профессор-ўқитувчилар салоҳияти, талабалар турар жойлари ва бошқа инфратузилма имкониятлари ҳисобга олинади.

 

Вазирлик хорижлик абитуриентларга Ўзбекистонда таълим олиш бўйича расмий «Study in Uzbekistan» платформасидан фойдаланиш, қабул шартлари ҳақида маълумотни бевосита танланган олий таълим ташкилотидан олиш ва воситачиларга асоссиз тўловларни амалга оширмасликни тавсия қилди.