Қозоғистонда спортчиларга сўкиниш тақиқланади
Янги спорт этикаси низоми спортчилар хулқ-атворига қатъий чекловлар киритмоқда.
Қозоғистонда спортчиларга, мураббийларга ва ҳакамларга сўкиниш, диний эътиқодини очиқ намойиш этиш ва бошқаларни диний фаолиятга ундаш тақиқланади. Бу ҳақда 2025 йил 8 июль куни эълон қилинган Қозоғистон Республикаси Туризм ва спорт вазири Эрбол Мирзабосиновнинг буйруғида маълум қилинди.
Буйруққа кўра, янги “Спорт этикаси тўғрисидаги низом” спортчиларнинг одоб-ахлоқ меъёрларини тартибга солади. У икки бўлимдан иборат бўлиб, биринчи бўлимда асосий тушунчалар — мураббий, ҳакам, спорт этикаси ва бошқалар — изоҳланади. Иккинчи бўлим эса спортчиларнинг ва бошқа иштирокчиларнинг хатти-ҳаракатларини тартибга солувчи қоидалардан иборат.
Асосий чекловлар:
Сўкиниш, рақиб ёки ташкилотчиларга ҳурматсизлик;
Диний рамзларни очиқ намойиш этиш ва миссионерлик фаолияти билан шуғулланиш;
Тренинглар ёки мусобақалар ҳақидаги махфий маълумотларни ошкор қилиш;
Спиртли ичимлик истеъмоли ёки ижтимоий ахлоққа зид ҳаракатлар;
Сиёсий чиқишлар, камситиш ёки таҳдидлар.
Шунингдек, спортчилардан давлат мадҳияси чоғида ахлоқий тартибга риоя қилиш, ҳакамлар билан тортишмаслик, оммавий ахборот воситалари билан ҳурмат асосида мулоқотда бўлиш ва ижобий намунали хулқ кўрсатиш талаб этилади.
Ҳужжат расмий равишда эълон қилинганидан 10 кун ўтиб кучга киради.
