Улуғбек Рашитов 2 йилга спортдан четлаштирилди

Халқаро тестлаш агентлиги (International Testing Agency – ITA) Жаҳон таэквондо федерацияси (World Taekwondo, WT) номидан эълон қилган баёнотга кўра, Рашитов 12 ой ичида уч марта жойлашув қоидаларини бузган ва икки йилга спорт мусобақаларидан четлатилган.

 

ITA маълумотига кўра, спортчи ADRV (Anti-Doping Rule Violation – антидопинг қоидабузарлиги) даъволарига қарши чиқмаган ва унга нисбатан қўлланилган жазони қабул қилган. Шу боис иш “натижаларни қабул қилиш” тартибида ёпилган. Таэквондочининг 2025 йил 3 февралдан қайд этилган барча шахсий натижалари бекор қилинди.

 

ITA бу иш бўйича бошқа изоҳ бермаслигини билдирган. Бироқ мазкур қарор WT антидопинг қоидаларининг 13.2.3-моддасига мувофиқ, спорт арбитраж судининг апелляция бўлимига шикоят қилиниши мумкин.

 

Улуғбек Рашитов — Ўзбекистон тарихидаги илк таэквондо бўйича Олимпия чемпиони бўлиб, у Токио-2020 ўйинларида олтин медални қўлга киритган эди. Мазкур дисквалификация унинг спорт фаолиятига жиддий таъсир кўрсатади.