Тошкентда таниш аёлини кўчада калтаклаган эркак 15 суткага қамалди
Жабрланган 26 ёшли аёл ички ишлар органлари ҳамда шифохонага мурожаат қилмаган.
Ижтимоий тармоқларда эркак томонидан аёлга нисбатан куч ишлатилган ҳолат акс этган видео кенг муҳокамаларга сабаб бўлди. Тошкент шаҳар Ички ишлар бош бошқармаси томонидан ҳолат юзасидан ўтказилган текширув натижасига кўра, воқеа 2025 йил 22 июль куни соат 13:30 ларда Миробод тумани Қўйлиқ-1 ҳудудида содир бўлган.
Аниқланишича, 1993 йилда туғилган фуқаро С.А. ўзаро келишмовчилик оқибатида олдиндан таниш бўлган, 1999 йилда туғилган Т.К. га жисмоний куч қўллаган. Эркак жамоат жойида одоб-ахлоқ қоидаларини қўпол равишда бузган, яъни атрофдагиларнинг осойишталигини бузувчи ҳаракатлар содир этган.
Маълум бўлишича, жабрланувчи ҳолат юзасидан на тиббиёт муассасаларига, на ички ишлар органларига мурожаат қилган. Шунга қарамай, ҳолат юзасидан Миробод тумани Ички ишлар бўлими томонидан зарурий ҳужжатлар расмийлаштирилди.
С.А.га нисбатан Ўзбекистон Республикаси Маъмурий жавобгарлик тўғрисидаги кодексининг 183-моддаси (Майда безорилик) ва 194-моддаси (Ички ишлар органлари ходимининг қонуний талабларини бажармаслик) асосида баённома тузилиб, иш Жиноят ишлари бўйича Миробод туман судига юборилди.
Суд қарорига кўра, фуқаро С.А. 15 суткага маъмурий қамоқ жазоси билан жазоланди.
