Ўзбекистонда кичик бизнес учун меҳнат шартномаларини электрон тарзда расмийлаштириш имконияти яратилади

Яқин ойларда Ўзбекистонда кичик бизнес субъектлари учун ходимлар билан меҳнат шартномаларини масофавий тарзда тузиш ва бекор қилиш имконини берувчи янги электрон платформа ишга туширилади. Бу ҳақда Бандлик ва камбағалликни қисқартириш вазири Ботир Зоҳидов маълум қилди.

 

Таъкидланишича, ушбу тизим ходимлар сони 50 нафаргача бўлган корхона ва ташкилотлар учун мўлжалланган бўлиб, ҳужжатлар айланмасини соддалаштириш, бюрократик тўсиқларни камайтириш ва меҳнат муносабатларини рақамлаштиришга хизмат қилади. Янги платформа мобил илова шаклида ҳам мавжуд бўлиб, ундан фойдаланиш қулайлиги билан ажралиб туради.

 

Президент топшириғига мувофиқ, айниқса хизмат кўрсатиш ва кичик тадбиркорлик йўналишларида меҳнат шартномаларини расмийлаштириш жараёнларини енгиллаштириш орқали аҳолининг иш билан бандлигини таъминлашда сезиларли енгилликлар яратилиши назарда тутилмоқда.

 

Шунингдек, вазир мамлакатда малака-ли кадрлар етишмовчилиги кескин долзарб масалалардан бири эканини қайд этди. Таҳлилларга кўра, айрим тармоқларда бу кўрсаткич 60 фоизгача етмоқда. Бу ҳолат, вазирнинг фикрича, иш қидирувчилар ва иш берувчилар ўртасида самарали алоқа тизимининг йўқлиги, шунингдек, касбий таълим мазмуни билан бозор эҳтиёжлари ўртасидаги номувофиқликдан далолат беради.

 

Келгусида бандлик тизимини модернизация қилиш орқали меҳнат органлари назорат функциясидан воз кечиб, иш берувчилар билан ҳамкорликда кадрлар танлаш, йўналтириш ва қайта тайёрлаш бўйича фаолият юритиши режалаштирилган. Касб-ҳунар таълими эса уч босқичли — бошланғич, қўшимча ва қайта тайёрлов моделларига асосланади.