Ўзбекистон Туркманистон устидан ғалаба қозонди

Бугун, 2 сентябрь куни Тошкентдаги “Олимпия” стадионида Ўзбекистон миллий терма жамоаси Туркманистонни 2:1 ҳисоби билан мағлуб этди. Ушбу ғалаба Ўзбекистоннинг CAFA Nations Cup-2025 турниридаги имкониятларини янада мустахкамлади.

 

Ўзбекистон терма жамоаси ҳужумчиси Игор Сергеев ўйиннинг 37-дақиқасида ҳисобни очди. 44-дақиқада эса пеналтидан гол уриб, ҳисобни 2:0 кўринишига олиб келди. 32 ёшли футболчи шу тариқа миллий терма жамоа сафидаги голлари сонини 22 тага етказди ва Одил Аҳмедовни ортда қолдириб, энг самарали тўпурарлар рўйхатида 6-ўринга чиқди. Туркманистон жамоасидан Дидар Дурдиев 84-дақиқада пеналтидан гол уриб, якуний натижани 2:1 кўринишида белгилади.

 

Учрашувнинг 59-дақиқасида Ўзбекистон футболчиси Фаррух Сайфиев рақиб дарвозабонига нисбатан қўпол ҳаракати учун қизил карточка олиб, майдонни тарк этди. Шу билан бирга, Ўзбекистон очколарини 4 тага етказиб, Уммон билан гуруҳ пешқадами бўлиб турибди.

 

Миллий терма жамоамиз 5 сентябрь куни бўлиб ўтадиган навбатдаги учрашувда Қирғизистон билан тўқнаш келади. Гуруҳда 1-ўринни эгаллаган жамоалар 8 сентябрь куни CAFA Nations Cup-2025 турнирининг финал учрашувида иштирок этади.