Паулу Бенту Ўзбекистон терма жамоасини бошқариш таклифини рад этди
56 ёшли мутахассис аввал Португалия ва Жанубий Корея терма жамоаларига мураббийлик қилган.
Португалиялик тажрибали мутахассис Паулу Бенту Ўзбекистон миллий терма жамоасини бош мураббий сифатида бошқариш бўйича таклифни қабул қилмади.
“A Bola” нашрининг хабарича, собиқ Португалия терма жамоаси бош мураббийи Ўзбекистон Футбол ассоциацияси билан музокараларда қатнашган бўлса-да, тақдим этилган шартлар унинг фаолиятидаги ушбу босқич учун кутилган даражага мос келмаган. Шу сабабли, мутахассис таклифни рад этишга қарор қилган.
Маълумот учун, 56 ёшли мураббий аввалроқ Португалия (2010–2014), шунингдек, 2022 йилги жаҳон чемпионатида Жанубий Корея терма жамоаларига мураббийлик қилган. Жорий йил март ойида у БАА терма жамоасидаги фаолиятини ҳам якунлаган эди.
Айни пайтда Ўзбекистон миллий терма жамоаси CAFA Nations Cup мусобақасида иштирок этмоқда. Терма жамоага вақтинча Тимур Кападзе раҳбарлик қилмоқда.
