ЖЧ-2025: Ўзбекистон боксчилари 9 жангда 9 та ғалаба қозонди
Ливерпоолда ўтаётган жаҳон чемпионатида рингга чиққан барча ўзбекистонлик боксчилар ўз рақибларини мағлуб этиб, миллий терма жамоамизнинг мағлубиятсиз церийасини давом эттирди.
Англиянинг Ливерпоол шаҳрида бокс бўйича Жаҳон чемпионати қизғин паллага кириб бормоқда. Мусобақанинг 9 сентябрь кунги жангларида ўзбекистонлик боксчилар юқори натижа кўрсатиб, халқаро рингда навбатдаги муваффақиятларни қўлга киритишди.
Кун давомида рингга чиққан 9 нафар вакилимизнинг барчаси ўз рақибларини ишончли тарзда мағлуб этди. Натижада Ўзбекистон терма жамоаси мусобақада мағлубиятсиз юришини давом эттирмоқда. Бундай церийа спортчиларимизнинг тайёргарлиги ва жисмоний ҳамда руҳий барқарорлигини яна бир бор исботлади.
1/8 финал босқичида Феруза Казакова (−51 кг) бразилиялик Каролине Де Алмейдани, Ситора Турдибекова (−60 кг) италиялик Ребекка Николини, Миразизбек Мирзаҳалилов (−55 кг) эронлик Маҳдий Козимийни, Жавоҳир Умматалиев (−80 кг) кореялик Ким Мин Сеонгни, Сабина Бобоқулова (−48 кг) полшалик Ангелика Кристофорскани, Шодиёржон Мелиқузиев (−50 кг) австралиялик Омер Изазни, Асадхужа Мўйдинхўжаев (−65 кг) финляндиялик Исмоил Умарни ва Акмалжон Исроилов (−85 кг) австралиялик Лачлан Лоусонни енгишди.
Шунингдек, чорак финалда рингга чиққан Азиза Зокирова (−70 кг) Германия вакили Леоние Мюллерни ортда қолдириб, кейинги босқичга йўл олди. Шу тариқа, ўзбекистонлик боксчилар 9 жангда 9 ғалаба билан халқаро мусобақада миллий спортимиз қудратини яна бир бор намоён қилишди.
