Исроил ЖЧ-2026 га чиқса, Испания мундиалда қатнашмайди
Исроилнинг Ғазодаги ҳаракатлари сабаб Испания ҳукумати футбол бўйича Жаҳон чемпионатидан воз кечиш эҳтимолини кўриб чиқмоқда.
Испания ҳукумати 2026 йилги футбол бўйича Жаҳон чемпионатида қатнашишдан воз кечиши мумкинлигини маълум қилди. Ушбу қарор Исроил саралашдан муваффақиятли ўтиб, мундиал йўлланмасини қўлга киритса кучга киради.
Ҳукуматнинг бундай кескин баёнотига Исроилнинг Ғазодаги ҳаракатлари сабаб бўлмоқда. Испаниянинг ҳукмрон Социалистик ишчилар партияси (PSOE) вакиллари Исроилни халқаро спортдан четлатиш кераклигини таъкидлашди.
Бош вазир Педро Санчес бу борада FIFA ва UEFA томонидан Россияга қўлланилган санкцияларни мисол қилиб келтирди: “Исроил халқаро майдонлардан ўз имиджини оқлаш воситаси сифатида фойдалана олмайди”, — деди у.
Испаниянинг спорт вазири Пилар Алегрия эса спортни “реал ҳаётдан ажратиб бўлмайди” дея таъкидлади ва бойкотни инсон ҳуқуқлари масаласи сифатида баҳолади. FIFA эса бу масалада мураккаб сиёсий босим остида қолиши мумкин.
