Оксфорд университетида ўзбек тилини ўрганиш лойиҳалари йўлга қўйилиши режалаштирилмоқда
Саида Мирзиёева Буюк Британия Адлия вазири билан таълим соҳасидаги ҳамкорликни муҳокама қилди.
Президент Администрацияси раҳбари Саида Мирзиёева 15 октябрь куни Буюк Британия Бош вазири ўринбосари, Адлия вазири Девид Лемми билан учрашув ўтказди.
Суҳбат чоғида Ўзбекистон ва Буюк Британия ўртасидаги таълим ва маданий ҳамкорликни кенгайтириш масалалари муҳокама қилинди. Хусусан, Ўзбекистон мактабларида Кембридж таълим дастурларининг айрим йўналишларини жорий этиш, инглиз тилида сўзлашувчи малакали ўқитувчиларни жалб қилиш ҳамда Оксфорд университетида ўзбек тилини ўрганиш бўйича қўшма лойиҳаларни йўлга қўйиш истиқболлари кўриб чиқилди.
Учрашувда инсон капиталини ривожлантириш, ёшлар учун замонавий билим олиш имкониятларини кенгайтириш ва икки мамлакат ўртасидаги илмий-маърифий алоқаларни янада мустаҳкамлаш масалаларига алоҳида эътибор қаратилди.
Саида Мирзиёева бундай ташаббуслар Ўзбекистон ва Буюк Британия халқлари ўртасидаги ўзаро ишонч ва дўстлик ришталарини янада мустаҳкамлашда муҳим ўрин тутишини таъкидлади.
