Ўзбекистонда суд иштирокчиларини четлаштириш механизми жорий этилиши мумкин

 

Ўзбекистон Республикаси Олий Мажлиси Қонунчилик палатаси томонидан маъмурий иш юритиш кодексига ўзгартишлар киритишни назарда тутувчи қонун лойиҳаси умумхалқ муҳокамасига тақдим этилди. Ҳужжатда судья, прокурор, адвокат, эксперт, таржимон ва бошқа иштирокчиларни манфаатлар тўқнашуви юзага келган ҳолларда суд жараёнидан четлаштириш тартибини белгиловчи янги бўлимни жорий этиш таклиф этилмоқда.

 

Мазкур ташаббуснинг асосий мақсади — адолатли судловни таъминлаш, холислик тамойилларини мустаҳкамлаш ҳамда суд тизимига бўлган жамоатчилик ишончини оширишдан иборат.

 

Лойиҳага кўра, агар судья, прокурор ёки бошқа иштирокчи илгари айни ишда жабрланувчи, гувоҳ, адвокат ёки эксперт сифатида қатнашган бўлса, томонлардан бири билан қариндошлик ришталари мавжуд бўлса ёки уларнинг холислигига шубҳа уйғотувчи ҳолатлар аниқланса, улар ишни кўришдан четлаштирилади.

 

Шунингдек, адвокат ёки эксперт манфаатлар тўқнашуви мавжуд бўлган тақдирда, ёки иш иштирокчиларидан бирига бўйсунадиган ҳолатда жараёнда қатнаша олмайди. Шу каби чекловлар таржимонлар, мутахассислар ва гувоҳларга нисбатан ҳам татбиқ этилади.

 

Рад этиш ёки ўзини ўзи рад этиш тўғрисидаги талабни суд иштирокчиси, шунингдек жавобгар, жабрланувчи, прокурор ёки уларнинг вакиллари билдиришлари мумкин. Ушбу талаблар дарҳол кўриб чиқилиб, тегишли қарор қабул қилинади.

 

Қонун ташаббускорларининг таъкидлашича, мазкур механизмнинг жорий этилиши маъмурий ишларнинг адолатли кўриб чиқилишини кафолатлаб, суд жараёнларида очиқлик ва ишончлиликни таъминлайди.