Россияда ҳибсга олинган ўзбекистонлик аёл ва фарзанди ватанга қайтарилди
Аёл иммиграция қонунчилигини бузганликда гумонланиб қўлга олинган.
Ўзбекистон Бош консуллиги дипломатлари томонидан хорижда оғир аҳволда қолган ватандошларни қайтариш бўйича навбатдаги амалий чоралар кўрилди. Бу ҳақда Дунё ахборот агентлиги хабар берди.
Маълум қилинишича, ёш она Россия ҳудудида иммиграция қонунчилигини бузганликда гумон қилиниб, Новосибирск шаҳрида ҳуқуқни муҳофаза қилувчи органлар томонидан ҳибсга олинган ва чет эл фуқароларини вақтинча сақлаш марказига жойлаштирилган.
Унинг вояга етмаган фарзанди эса бу вақтда шаҳардаги «Оила» ижтимоий ёрдам марказида сақланган ва Бош консулнинг шахсий назоратида бўлган.
Ўзбекистон дипломатларининг тезкор чоралар кўриши натижасида бола учун барча зарур ҳужжатлар расмийлаштирилди ва она-фарзанд 17 февраль куни Ўзбекистонга қайтарилди.
