Кўксарой қароргоҳида Президент Шавкат Мирзиёевнинг ёшлар билан очиқ мулоқоти бошланди
Учрашувда Қорақалпоғистон, барча вилоятлар ва Тошкент шаҳридаги студиялар орқали 60 мингдан зиёд ёшлар вакиллари иштирок этмоқда.
«Кўксарой» қароргоҳида Ўзбекистон Президенти Шавкат Мирзиёевнинг ёшлар билан очиқ мулоқоти бошланди. Мазкур учрашувда Қорақалпоғистон Республикаси, вилоятлар ҳамда Тошкент шаҳридаги студиялар орқали 60 мингдан зиёд ёшлар вакиллари иштирок этмоқда.
Таъкидланганидек, мамлакатда ёшлар учун яратилган кенг имкониятлар натижасида сўнгги йилларда ўғил-қизлар жаҳон фан олимпиадаларида юксак натижаларга эришиб, 66 та олтин, 147 та кумуш ва 221 та бронза медални қўлга киритди.
Бугунги кунда иқтидорли ёшлар дунёнинг энг нуфузли олий таълим муассасалари, жумладан Harvard University, Yale University, Princeton University, Columbia University вa Cornell University'да таҳсил олмоқда. Ушбу нуфузли олийгоҳларда ўқиётган ёшлар сони 500 нафардан ошган бўлса, ТОП-100 таликка кирувчи университетларда таълим олаётган ўзбекистонлик талабалар сони 3,5 минг нафардан ортди.
Шунингдек, янгиликка интилувчан ёшлар томонидан яратилган 63 та стартап лойиҳаси АҚШ, Жанубий Корея, Буюк Британия ва Бирлашган Араб Амирликлари бозорларига муваффақиятли кириб борди.
Ёш спортчилар ҳам халқаро ареналарда юрт шаънини муносиб ҳимоя қилиб, 720 та олтин, 671 та кумуш ва 854 та бронза медалларни қўлга киритди. Бугунги кунда ёш тадбиркорлар мамлакатдаги бизнес вакилларининг қарийб 35 фоизини ташкил этмоқда.
