Ўзбекистонда сунъий интеллектни яратиш ва фойдаланиш бўйича этика қоидалари тасдиқланди
Мазкур этика қоидалари сунъий интеллектга асосланган ечимларни яратиш, жорий қилиш ва фойдаланиш бўйича тамойиллар ва талабларни, шунингдек сунъий интеллект иштирокчиларининг ҳуқуқ ва мажбуриятларини белгилайди.
Адлия вазирлиги 14 март 2026 йилда Сунъий интеллектга асосланган ечимлар этика қоидаларини давлат рўйхатидан ўтказди. Бу ҳақда “Ҳуқуқий ахборот” Telegram-каналида хабар берилди.
Қайд этилишича, мазкур этика қоидалари сунъий интеллектга асосланган ечимларни яратиш, жорий қилиш ва фойдаланиш бўйича тамойиллар ва талабларни, шунингдек сунъий интеллект иштирокчиларининг ҳуқуқ ва мажбуриятларини белгилайди.
Ҳужжат сунъий интеллект технологиялари ва тизимларидан фойдаланишда қуйидаги асосий этика тамойилларини белгилайди:
— қонунийлик,
— шахс, жамият ва давлат манфаатлари ҳамда атроф-муҳитни ҳимоя қилиш устуворлиги,
— тушунарлилик,
— масъулият ва назорат,
— адолатлилик ва камситишга йўл қўймаслик
— очиқлик ва шаффофлик,
— маълумотлар ҳимояси ҳамда ишончлилик ва хавфсизлик.
Шу билан бирга, қоидалар сунъий интеллект технологиялари асосида ишлайдиган ахборот тизимлари натижасига таянмаслик керак бўлган соҳаларни ҳам белгилаган. Инсон ҳуқуқ ва эркинликларига алоқадор юридик қарорларни, соғлиқни сақлаш соҳасидаги (касалликларни ташхислаш, даволаш усуллари ва бошқа) қарорларни қабул қилишда сунъий интеллектга таянмаслик кераклиги таъкидланган.
Қоидаларга мувофиқ, сунъий интеллект технологияларини ишлаб чиқувчи ва жорий этувчилар фойдаланувчиларга улардан қандай мақсадда фойдаланиш мумкинлиги ёки тақиқланганлиги, сунъий интеллект ечимлари доим тўғри бўлмаслиги ва натижалардан фақат тавсиявий ёки маълумот учун фойдаланиш мумкинлиги ҳақидаги маълумотларни тақдим қилиши зарур бўлади.
Шунингдек, қоидаларда сунъий интеллект иштирокчиларининг ҳуқуқ ва мажбуриятлари белгилаб берилган.
