Ўзбекистонда аэропортлар яқинида варрак учириш тақиқланиб, назорат кучайтирилди
Қоидабузарларга 20–100 БҲМ жарима ёки 15 суткагача қамоқ жазоси қўлланади.
Ўзбекистонда варрак учириш мавсуми бошланиши сабаб аэродромлар яқинида ҳаво майдонидан фойдаланиш устидан назорат кучайтирилди. Мутахассислар бундай фаолият самолётлар парвоз хавфсизлигига жиддий таҳдид туғдиришини таъкидламоқда.
Uzbekistan Airports маълумотига кўра, аэродром ҳудудларида парвозлар хавфсизлигига таъсир кўрсатиши мумкин бўлган ҳар қандай фаолият қатъиян тақиқланган. Варраклар баландликка кўтарилиб, самолётлар билан тўқнашув хавфини юзага келтириши, уларнинг ипи двигателларга ўралиб қолиши ёки техник носозликларга сабаб бўлиши мумкин.
Ҳаво кодексининг 17-моддасига мувофиқ, парвоз хавфсизлигига таҳдид солувчи фаолиятга, шунингдек, ҳаво кемалари ва бортдаги одамлар хавфсизлигига таъсир кўрсатиши мумкин бўлган ҳар қандай фаолият киради. Аэропорт ҳудудида ҳаво ўйинчоқларини учириш бундай хавфларга тааллуқлидир.
Шунингдек, Маъмурий жавобгарлик тўғрисидаги кодекснинг 116²-моддасига биноан, бундай қоидабузарликлар учун 20 дан 100 базавий ҳисоблаш миқдоригача жарима ёки 15 суткагача маъмурий қамоқ жазоси қўлланилиши мумкин. Агар ушбу ҳаракатлар оғир оқибатларга олиб келса, жумладан авиаҳалокат юз берса, жиноий жавобгарликка сабаб бўлиши ҳам мумкин.
Мутасадди ташкилотлар фуқаролар ва мамлакат меҳмонларини дам олиш учун парвоз йўналишларидан узоқ ҳудудларни танлашга чақирмоқда. Таъкидланишича, ушбу қоидаларга риоя қилиш нафақат мажбурият, балки йўловчилар ва экипаж хавфсизлигини таъминлашга қўшилган муҳим ҳиссадир.
