Тошкентда 15 та машина иштирокида ЙТҲ содир бўлди
Соғлиги ёмонлашиб, бошқарувни йўқотган ҳайдовчи бир нечта машиналарга урилиб кетган.
Жорий йил 5 май куни соат 16:25 ларда Тошкент шаҳри Мирзо Улуғбек туманида жойлашган М. Улуғбек кўчасида йўл-транспорт ҳодисаси содир бўлди. Бу ҳақда Йўл ҳаракати хавфсизлиги хизмати маълум қилди.
Дастлабки маълумотларга кўра, “Equinox” русумли автомобиль ҳайдовчиси ҳаракат вақтида соғлиги ёмонлашгани сабабли бошқарувни йўқотган. Натижада у светофорнинг қизил чироғида тўхтаб турган бир нечта транспорт воситаларига урилиб, тўқнашув содир этган.
Ҳодиса оқибатида ҳалок бўлганлар йўқ. Жами 15 та транспорт воситаси техник шикастланган. “Equinox” ҳайдовчиси тан жароҳати олган ҳолда шифохонага етказилган.
Мазкур ҳолат юзасидан Тошкент шаҳар ИИББ ЖХХ ЙҲХБ масъул ходимлари томонидан суриштирув ишлари олиб борилмоқда.
