ОТМ битирувчиларидан диплом ҳимоя олдидан қўшимча ҳужжатлар талаб қилиняптими?
Талабалардан ўзини ўзи банд қилгани тўғрисида маълумот, расмий иш жойидан маълумотнома ёки уч томонлама шартнома талаб қилинаётгани ҳақидаги хабарларга расмий изоҳ берилди.
Ижтимоий тармоқларда давлат олий таълим муассасалари битирувчиларидан диплом ҳимояси олдидан турли қўшимча ҳужжатлар — ўзини ўзи банд қилгани тўғрисида маълумот, расмий иш жойидан маълумотнома ёки уч томонлама шартнома талаб қилинаётгани ҳақидаги хабарлар юзасидан расмий изоҳ берилди.
Олий таълим, фан ва инновациялар вазирлиги маълум қилишича, амалдаги тартибларга кўра, битирувчилардан диплом бериш ёки битирув малакавий ишини ҳимоя қилиш жараёнида уларнинг иш билан бандлигига оид қўшимча ҳужжатларни тақдим этиш талаб этилмайди. Битирув малакавий ишини ҳимояга қўйиш фақат ўқув жараёни билан боғлиқ мезонлар асосида амалга оширилади.
Қайд этилишича, битирувчиларнинг бандлик ҳолатини таҳлил қилиш ва уларнинг меҳнат бозорига кириб боришини кузатиш мақсадида бир қатор давлат идоралари ўртасида ахборот тизимлари интеграция қилинган. Хусусан, Солиқ қўмитаси, Камбағалликни қисқартириш ва бандлик вазирлиги, Адлия вазирлиги ҳамда Ижтимоий ҳимоя миллий агентлиги ўртасида мониторинг ишлари олиб борилмоқда.
Мазкур жараёнлар рақамли платформалар орқали автоматик тарзда амалга оширилади ва талабалар зиммасига қўшимча ҳужжатлар тақдим этиш мажбуриятини юкламайди.
Вазирлик барча олий таълим ташкилотларига битирувчилар билан ишлашда қонунчилик талабларига қатъий риоя қилиш, ортиқча бюрократик тўсиқларга йўл қўймаслик ҳамда маълумотларни йиғишда ихтиёрийлик тамойилига амал қилиш бўйича кўрсатмалар берилганини билдирди.
