Президент фармони билан икки нафар кинорежиссёр “Келажак бунёдкори” медали билан тақдирланди
Канн шаҳрида ўтказилган халқаро инклюзив кинофестивалда Гран-при совринини қўлга киритган ўзбекистонлик киноижодкорлар Тошкент халқаро аэропортида тантанали кутиб олинди.
Тошкент халқаро аэропортида Франциянинг Канн шаҳрида ўтказилган ENTRE DEUX CANNES 17-халқаро инклюзив кинофестивалида юксак натижага эришган ўзбекистонлик киноижодкорларни тантанали кутиб олиш маросими бўлиб ўтди. Бу ҳақда Маданият вазирлиги матбуот хизмати хабар берди.
Аввал хабар қилинганидек, “Cannes Film Festival” доирасида ташкил этилган нуфузли халқаро кинофестивалда ўзбекистонлик ижодкорлар томонидан суратга олинган “Қадам. Қуёш боласи Юсуф” номли қисқа метражли фильм энг олий мукофот — Гран-при совринига сазовор бўлди.
Мазкур халқаро муваффақият Президент Шавкат Мирзиёев томонидан ҳам алоҳида эътироф этилиб, “Халқаро кинофестивалда ғолибликни қўлга киритган ёш ижодкорларни мукофотлаш тўғрисида”ги Фармон қабул қилинди. Унга мувофиқ, Гран-при совриндорлари “Келажак бунёдкори” медали билан тақдирланди.
Тантанали кутиб олиш маросимида Маданият вазири Озодбек Назарбеков, Президент Администрацияси вакиллари, маданият ва санъат соҳаси мутасаддилари, давлат ва жамоат ташкилотлари вакиллари, кино ихлосмандлари ҳамда оммавий ахборот воситалари ходимлари иштирок этди.
Тадбир давомида Президент Фармонига мувофиқ “Келажак бунёдкори” медали билан тақдирланган кинорежиссёрлар Суҳроб Қодиров ва Дилшодбек Усмоновга мукофотлар тантанали равишда топширилди.
