Турк киноси юлдузлари Тошкентда: кино кунлари бошланади
25–29 сентябрь кунлари Тошкентда “Турк киноси кунлари” бўлиб ўтади. Тадбирнинг очилиш маросимида Энгин Альтан Дузятан, Озге Гурел, Серкан Чаёглу ва Дениз Барут ўзбекистонлик мухлислар билан учрашади.
25–29 сентябрь кунлари Тошкентда Туркия–Ўзбекистон маданият ва санъат учрашувлари доирасида “Турк киноси кунлари” бўлиб ўтади. Бу ҳақда Туркиянинг Ўзбекистондаги элчихонаси Zamon.uz'ga маълум қилди.
Ўзбекистон мустақиллигининг 35 йиллиги муносабати билан ташкил этилаётган тадбир Туркия Маданият ва туризм вазирлиги Кинематография бош бошқармаси кўмагида Ўзбекистон Миллий кино санъати саройида ўтказилади.
Беш кун давомида томошабинларга турли жанрлардаги турк фильмлари намойиш этилади. Дастурдан ижодий учрашувлар ҳамда таниқли кино вакиллари иштирокидаги тадбирлар ҳам ўрин олган.
25 сентябрь куни бўлиб ўтадиган тантанали очилиш маросимида таниқли турк актёрлари Энгин Альтан Дузятан, Озге Гурел, Серкан Чаёглу ва Дениз Барут қизил йўлакдан ўтиб, ўзбекистонлик мухлислар билан учрашади.
Очилиш маросимида Туркиянинг маданий мероси ва сайёҳлик салоҳиятини халқаро томошабинларга таништирувчи “Kökenlerin Fısıltısı” мини-сериали ҳам намойиш этилади. Унда бош ролларни ижро этган Энгин Альтан Дузятан ва Озге Гурел гала-кечада томошабинлар билан учрашади.
Шунингдек, TRT телеканалининг “Mehmed: Fetihler Sultanı” сериалида Фотиҳ Султон Меҳмед образини гавдалантирган Серкан Чаёглу ҳамда “Bak Postacı Geliyor” фильмида Гулизар ролини ижро этган Дениз Барут тадбирда иштирок этади.
26 сентябрь куни фильм намойишлари режиссёр Тунч Давутнинг “Kesilmiş Bir Ağaç Gibi” фильми билан бошланади. Али Ипин, Фейяз Думан ва Селен Куртаран бош ролларни ижро этган ушбу фильм 99-Оскар мукофотининг “Энг яхши халқаро фильм” йўналишида Туркиянинг расмий номзоди сифатида танланган.
27 сентябрь куни режиссёр Юксел Аксунинг “Bak Postacı Geliyor” фильми намойиш этилади. 1950-йилларда Эгей минтақасидаги кичик шаҳарчада кечадиган воқеалар марказида почтачи Осмоннинг Гулизарга етишиш йўлидаги кураши тасвирланган. Бош ролларни Дениз Барут ва Озан Акбаба ижро этган.
28 сентябрь куни режиссёрлар Ибраҳим Буюкак ва Эмраҳ Агуш суратга олган “Mutluyuz mu?” фильми томошабинларга тақдим этилади. Унда бош ролларни Ибраҳим Буюкак ва Ясемин Сакаллиоғлу ижро этган.
“Турк киноси кунлари” 29 сентябрь куни режиссёрлар Эмре Караел ва Лейла Яманнинг “Dedektif Reptır” анимацион фильми намойиши билан якунланади. Фильм сирли воқеаларга ойдинлик киритишга интилаётган Детектив Reptır ва унинг жамоаси саргузаштлари ҳақида ҳикоя қилади.
