Саида Мирзиёева БМТнинг жиноятчиликка қарши кураш бўйича комиссиясининг 35-сессиясида иштирок этди
Ўзбекистоннинг жиноятчилик профилактикаси борасидаги тажрибаси халқаро экспертлар томонидан юқори баҳоланди.
Вена шаҳрида БМТнинг Жиноятчиликнинг олдини олиш ва жиноий одил судлов бўйича комиссиясининг 35-сессияси бўлиб ўтди. Унда 175 та давлатдан 1,5 мингдан зиёд юқори мартабали раҳбар ва экспертлар иштирок этди. Бу йил Ўзбекистон илк бор ушбу нуфузли тузилмага аъзо бўлди. Сессияда Президент Администрацияси раҳбари Саида Мирзиёева иштирок этиб, нутқ сўзлади.
Таъкидланганидек, Ўзбекистоннинг ушбу нуфузли комиссияга тўлақонли аъзо этиб сайланиши мамлакатнинг халқаро ҳуқуқий сиёсат ва глобал кун тартибини шакллантириш жараёнларидаги иштирокини янада мустаҳкамлади.
БМТнинг Гиёҳванд моддалар ва жиноятчилик бўйича бошқармасининг Афғонистон, Марказий Осиё, Эрон ва Покистон бўйича минтақавий вакили Оливер Штолпе Ўзбекистоннинг комиссиядаги иштирокини юқори баҳолаб, мамлакат трансмиллий таҳдидларга қарши кураш масаласига жиддий ёндашаётганини таъкидлаган.
Унинг қайд этишича, Ўзбекистон томонидан илгари сурилган ёндашув жиноятчиликнинг олдини олишни фақат ҳуқуқни муҳофаза қилувчи органлар фаолияти сифатида эмас, балки оила ва маҳаллий ҳамжамиятлардан бошланадиган комплекс жараён сифатида кўриб чиқиши билан аҳамиятлидир.
Шунингдек, Оливер Штолпе ҳуқуқбузарликлар профилактикаси инспекторлари институти фаолиятини алоҳида эътироф этиб, ушбу тажрибани ўрганиш ва икки томонлама ҳамкорликни янада кенгайтиришга қизиқиш билдирди.
