Саида Мирзиёева UNEP ва GEF раҳбарлари билан учрашди
Учрашувларда чўлланишга қарши кураш, биологик хилма-хилликни асраш ва ресурслардан оқилона фойдаланиш масалалари муҳокама қилинди.
Самарқанд шаҳрида ўтаётган Глобал экологик жамғарманинг (GEF) 8-Ассамблеяси доирасида Президент Администрацияси раҳбари Саида Мирзиёева БМТ Бош котиби ўринбосари, БМТ Атроф-муҳит дастури (UNEP) ижрочи директори Ингер Андерсен ҳамда Глобал экологик жамғарма бош ижрочи директори Клод Гаскон билан учрашувлар ўтказди.
Мулоқот чоғида Марказий Осиё минтақаси учун долзарб бўлган экологик масалалар, жумладан, чўлланиш ва ерлар деградациясига қарши курашиш, ҳаво сифати мониторингини такомиллаштириш, биологик хилма-хилликни асраш ҳамда табиий ресурслардан оқилона фойдаланиш йўналишларидаги ҳамкорлик истиқболлари муҳокама қилинди.
Саида Мирзиёева UNEP ва GEF раҳбариятига Ўзбекистонда амалга оширилаётган “яшил” ислоҳотларни қўллаб-қувватлаётгани ҳамда экологик барқарорликни таъминлашга қаратилган ташаббусларга қўшаётган ҳиссаси учун миннатдорлик билдирди.
Шунингдек, у Глобал экологик жамғарманинг Самарқандда ўтказилган тарихий 8-Ассамблеяси муваффақиятли ўтгани билан халқаро ташкилотлар вакилларини табриклади.
