Эрон АҚШ билан келишув учун 24 миллиард долларлик активларни музлатишдан чиқаришни талаб қилди
Эрон расмийсининг таъкидлашича, Теҳрон ва Вашингтон ўртасидаги музокаралар боши берк кўчага кириб қолган.
Эрон ва АҚШ ўртасида муҳокама қилинаётган эҳтимолий келишув Теҳроннинг хориждаги 24 миллиард долларлик активларини музлатишдан чиқариш масаласига боғлиқ бўлиб қолмоқда. Бу ҳақда Эрон Олий раҳбарининг ҳарбий маслаҳатчиси Моҳсен Ризоий CNN телеканалига берган интервюсида маълум қилди.
Унинг таъкидлашича, ҳозирги вақтда икки давлат ўртасидаги музокаралар боши берк кўчага кириб қолган ва вазиятни ўзгартириш АҚШ президенти Доналд Трамп қўлида.
“Эрон активларини музлатишдан чиқариш икки томон ўртасидаги ишончни мустаҳкамлаш йўлидаги муҳим қадам бўлиши мумкин. Бу маблағлар Эронга тегишли бўлиб, улар АҚШники эмас”, — дея таъкидлаган Ризоий.
Маълум қилинишича, Теҳрон вақтинчалик келишув имзолангач дарҳол 12 миллиард доллар, кейинги босқичда эса яна 12 миллиард доллар маблағни озод қилишни талаб қилмоқда.
CNN маълумотларига кўра, АҚШ расмийлари ушбу активларга қўйилган чекловларни бекор қилиш Вашингтоннинг Теҳронга нисбатан энг муҳим босим воситаларидан бирини йўқотишига олиб келишидан хавотир билдирмоқда.
Шу сабабли, музлатилган активлар масаласи Эрон ва АҚШ ўртасидаги музокараларнинг энг муҳим ва баҳсли мавзуларидан бири бўлиб қолмоқда. Томонлар ўртасидаги келишув истиқболлари айнан ушбу масаланинг қандай ҳал этилишига боғлиқ экани қайд этилмоқда.
