Сурункали бел оғриғидан қутулиш йўли топилди

 

Норвегия ва Дания олимлари ўтказган янги тадқиқотга кўра, кунига атиги 100 дақиқа юриш сурункали бел оғриғи хавфини деярли 25 фоизга камайтиради.

 

Тадқиқот муаллифларидан бири Раян Хаддаж бу тажрибани муҳим дея баҳолаб, шундай дейди: “Юриш — бу арзон, осон ва оммага татбиқ этилиши мумкин бўлган соғлом фаолият. У бел оғриғи билан курашишда самарали усул бўлиши мумкин”.

 

Тадқиқот давомида 20 ёшдан ошган 11 мингдан ортиқ иштирокчининг ҳаракатлари таҳлил қилинган. 2017–2019 йилларда улар етти кун давомида махсус акселерометр мосламаларини тақиб юришган, сўнгра 2021–2023 йилларда уларнинг соғлиғи яна баҳоланган — айниқса бел оғриғи бор-йўқлиги сўралган.

 

Иштирокчилар юриш давомийлигига кўра тўрт гуруҳга бўлинди:

 

• 78 дақиқадан кам юрувчилар
• 78–100 дақиқа юрувчилар
• 101–124 дақиқа юрувчилар
• 125 дақиқадан кўп юрувчилар

 

Натижалар шуни кўрсатдики, юриш давомийлиги ошгани сайин бел оғриғи хавфи камаяди. Шунингдек, ўртача ва тез юриш сурункали оғриқларнинг олдини олишда секин юришга қараганда самаралироқ эканлиги аниқланган.

 

CNNнинг таъкидлашича, дунё бўйлаб ҳозирда 600 миллиондан ортиқ одам бел оғриғидан азият чекмоқда. Жаҳон соғлиқни сақлаш ташкилоти прогнозларига кўра, бу рақам 2050 йилга келиб 843 миллионга етади.