Туркияда одам савдоси ва фирибгарликда гумон қилинган ўзбекистонлик аёллар қўлга олинди
6 йил давомида фирибгарликда айбланиб қидирувдагиган аёл фуқароларни АҚШ ва Европага ишга юборишни ваъда қилиб, уларнинг пулларини ўзлаштирган.
Ўзбекистон ва Туркия ҳуқуқни муҳофаза қилувчи органлари ҳамкорлигида ўтказилган тезкор-қидирув тадбирлари натижасида узоқ йиллардан буён қидирувда бўлган икки нафар Ўзбекистон фуқароси Туркияда қўлга олиниб, мамлакатга қайтарилди. Бу ҳақда мамлакатнинг Истанбулдаги Бош консуллиги матбуот хизмати хабар берди.
Маълум қилинишича, улардан бири фирибгарлик жиноятини содир этганликда айбланиб, олти йил давомида қидирувда бўлган. У хорижда ишга жойлаштириш фаолияти билан шуғулланиш учун тегишли лицензияга эга бўлмаган ҳолда фуқароларни АҚШ ва Европа давлатларида юқори маошли иш билан таъминлашни ваъда қилган.
Тергов маълумотларига кўра, у ушбу ваъдалар орқали фуқароларнинг ишончига кириб, катта миқдордаги маблағларни фирибгарлик йўли билан қўлга киритган ҳамда уларни шахсий эҳтиёжлари учун сарфлаган. Мазкур ҳолат юзасидан унга нисбатан Жиноят кодексининг 168-моддаси (фирибгарлик) билан жиноят иши қўзғатилган.
Шунингдек, Жиноят кодексининг 135-моддаси (одам савдоси) бўйича қидирувда бўлган яна бир фуқаро ҳам Туркия ҳудудида аниқланиб, Ўзбекистонга қайтарилган.
Масъул идоралар маълумотига кўра, ҳозирда ҳам Ўзбекистон ва Туркия ҳуқуқни муҳофаза қилувчи органлари ўртасидаги ҳамкорлик доирасида қидирувдаги бошқа шахсларни аниқлаш, ушлаш ва ватанга қайтариш бўйича тезкор-қидирув ҳамда процессуал тадбирлар давом эттирилмоқда.
