Нурафшон шаҳар ҳокими Илҳом Қиличхонов лавозимидан озод этилди

 

Тошкент вилояти Нурафшон шаҳри ҳокими Илҳом Қиличхонов эгаллаб турган лавозимидан озод этилди. Бу ҳақда вилоят ҳокимлиги матбуот хизмати маълум қилди.

 

Қайд этилишича, Илҳом Қиличхонов фаолиятини бошқа лавозимда давом эттиради. Маълум қилинишича, 8 июн куни Тошкент вилоятида бир қатор ташкилий масалалар кўриб чиқилиши режалаштирилган.

 

Илҳом Қиличхонов 2023 йил апрел ойидан буён Нурафшон шаҳри ҳокими сифатида фаолият юритиб келаётганди. У мазкур лавозимга тайинланишидан аввал Қурилиш ва уй-жой коммунал хўжалиги соҳасида назорат қилиш инспекцияси бошлиғи ўринбосари лавозимида ишлаган.

 

Эслатиб ўтамиз, жорий йил 24 апрел куни Президент Шавкат Мирзиёев раислигида ўтказилган видеоселектор йиғилишида Нурафшон шаҳри, Ғузор, Нарпай, Урганч, Янгийўл ва Чиноз туманлари раҳбарларининг лавозимига лойиқлигини қайта кўриб чиқиш топширилганди.

 

Мазкур йиғилишда Нурафшон шаҳар ҳокими фаолияти ҳам танқид остига олинган эди. Хусусан, икки йилдан буён қурилиш ишларини бошлай олмаётган тадбиркор муаммосини ҳал этиш ўрнига, масаланинг қандай қилиб Президент даражасигача етиб боргани билан қизиқаётгани қайд этилганди.