Қашқадарёдаги 2,5 млрд сўмлик кўприк уч йил ичида яроқсиз ҳолга келгани айтилмоқда
Кўприкдаги муаммолар Қизил дарё ўзанининг чўкиши оқибатида юзага келган.
Қашқадарё вилоятининг Яккабоғ туманида Хиёбон ва Гулистон маҳаллаларини боғлаб турувчи кўприк яроқсиз ҳолатга келган. Бу ҳақда Uzdiplomat хабар берди.
Маълум қилинишича, кўприк Қизил дарё ўзанининг чўкиши оқибатида хавфли ҳолатга келиб қолган. Ҳудудда фаолият юритувчи жамоат фаоли Элмурод Одилнинг таъкидлашича, иншоот ҳозирда хавфли ҳолатга келиб қолган.
Аҳоли вакиллари масъул ташкилотлардан ҳудудда зудлик билан хавфсизлик чораларини кўришни сўрамоқда.
Қайд этилишича, мазкур кўприк қурилиши 2019 йилда бошланган ва 2022 йилда якунланган.
Мурожаатчилар кўприкни миллиардлаб сўм эвазига қурган ташкилотлар томонидан қандай кафолатлар берилгани, шунингдек, иншоотни фойдаланишга қабул қилган масъуллар нега вазият юзасидан муносабат билдирмаётганига аниқлик киритилишини сўрамоқда.
Таъкидланишича, бу мазкур масала юзасидан илк мурожаат эмас. Аҳоли вакиллари аввал ҳам кўприкдаги муаммоларни кўтарган.
“Кўприкка фақат фавқулодда ҳолат юз берсагина эътибор қаратиладими?” дея савол қўймоқда мурожаатчилар.
