Тошкентда уй шароитида каннабис етиштирган шахс ушланди

 

Давлат хавфсизлик хизмати ҳамда ички ишлар органлари ходимлари ҳамкорлигида ўтказилган тезкор-қидирув тадбирлари давомида Тошкент шаҳри ва Хоразм вилоятида гиёҳвандлик воситаларининг ноқонуний муомаласига алоқадор шахслар қўлга олинди. Бу ҳақда ДХХ Zamon.uz'га малум қилди.

 

Маълум қилинишича, Тошкент шаҳрида яшовчи, 1996 йилда туғилган ва муқаддам судланган фуқаро интернет орқали гиёҳвандлик воситаларини сотиш билан шуғулланиб келган. Унинг Мирзо Улуғбек туманидаги вақтинчалик яшаш хонадони кўздан кечирилганда гиёҳвандлик воситаси, 300 дона зип-пакет, изоленталар ҳамда электрон тарози аниқланиб, ашёвий далил сифатида расмийлаштириб олинган.

 

Дастлабки суриштирув жараёнида ушбу шахс Тошкент туманида жойлашган, онасига тегишли хонадонда гидропоника усулида гиёҳвандлик ўсимликларини етиштириб келаётгани маълум бўлган. Мазкур манзил кўздан кечирилганда 10 туп каннабис ўсимлиги, бир туп қуритилган гиёҳвандлик воситаси, шунингдек, уларни парваришлашда фойдаланилган махсус воситалар ва электрон тарози мусодара қилинган.

 

Яна бир ҳолатда, “Самарқанд–Хоразм” йўналишида ҳаракатланаётган Cоbalt автомашинаси Тупроққалъа тумани ҳудудида тўхтатилиб текширилган. Натижада автомашинада йўловчи сифатида кетаётган Ургут туманида яшовчи 2003 йилда туғилган шахсга тегишли 810 грамм опий моддаси борлиги аниқланган.

 

Терговга қадар текширувларда ушбу гиёҳвандлик воситаси қўшни давлатдан контрабанда йўли билан олиб кирилгани ва Хоразм вилоятида сотиш мақсадида ташиб кетилаётгани маълум бўлган.

 

Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда. Шунингдек, гумонланувчиларнинг эҳтимолий жиноий шерикларини аниқлаш бўйича тезкор тадбирлар давом эттирилмоқда.