Пашинян сайловда ғалаба қозонди
Арманистондаги парламент сайловларида Пашинян партияси 50,07 фоиз овоз тўплаб, етакчилик мавқеини сақлаб қолди.
Арманистонда бўлиб ўтган парламент сайловларининг дастлабки натижаларига кўра, Бош вазир Никол Пашинян бошчилигидаги “Фуқаролик шартномаси” партияси энг кўп овоз тўплади. Бу ҳақда News.am нашри хабар берди.
Марказий сайлов комиссияси маълумотларига кўра, бюллетенларнинг 94 фоизи қайта ишлангач, ҳукмрон сиёсий куч 50,07 фоиз овоз билан биринчи ўринни эгаллаган.
Иккинчи ўринда миллиардер Самвел Карапетян етакчилигидаги “Кучли Арманистон” иттифоқи 23,35 фоиз овоз билан қайд этилган.
Учинчи натижани эса Арманистоннинг собиқ президенти Роберт Кочарян бошчилигидаги “Арманистон” блоки кўрсатиб, сайловчиларнинг 9,96 фоиз қўлловига эришган.
Шунингдек, “Гуллаб-яшнаётган Арманистон” партияси 3,99 фоиз, “Бирлик қанотлари” партияси эса 2,28 фоиз овоз тўплаган.
Дастлабки натижаларга кўра, янги парламент таркибида учта сиёсий куч — “Фуқаролик шартномаси”, “Кучли Арманистон” ва “Арманистон” блоклари вакиллик қилиши кутилмоқда.
Маълумот учун, 7-июн куни бўлиб ўтган парламент сайловларида жами 18 та сиёсий партия ва блок иштирок этган. Қонунчиликка кўра, партиялар учун сайлов тўсиғи 4 фоиз, блоклар учун эса уларнинг таркибига қараб 8–10 фоиз этиб белгиланган.
