Электрон кўтаргичлар нима учун ишламаяпти? — Метрополитен жавоб берди

 

Ижтимоий тармоқларда метро бекатларининг кириш ва чиқиш қисмларида ўрнатилган электрон кўтаргич қурилмалари (пандуслар) ишламаётгани ҳамда улардан фойдаланишда айрим ноқулайликлар мавжудлиги ҳақида хабарлар тарқалди. Мазкур ҳолат юзасидан “Тошкент метрополитени” расмий изоҳ берди.

 

Қайд этилишича, сўнгги йилларда Тошкент метросидан фойдаланувчилар сони сезиларли даражада ошгани сабабли ҳаракатланишда имконияти чекланган шахслар ва кекса йўловчилар учун қулай шароит яратиш мақсадида метро бекатларида замонавий электрон кўтаргич пандуслари ўрнатилмоқда.

 

Мазкур лойиҳа Тошкент шаҳар ҳокимлигининг “Ягона буюртмачи хизмати” инжиниринг компанияси буюртмаси асосида амалга оширилмоқда. Қурилиш-монтаж ишлари эса “Технопарк” МЧЖ томонидан бажарилмоқда.

 

Ҳозирда ушбу пандусларни ўрнатиш, созлаш ва синовдан ўтказиш жараёнлари давом этмоқда. Шу сабабли қурилмалар ҳали тўлиқ ишга туширилмаган.

 

Метрополитен маълумотига кўра, пандусларни тез ва сифатли якунлаш бўйича масъул ташкилотларга бир неча бор расмий мурожаатлар юборилган. Шунингдек, бу масала Тошкент шаҳар ҳокимлигида ўтказилган йиғилишда ҳам кўриб чиқилиб, тегишли топшириқлар берилган.

 

Таъкидланишича, электрон пандуслар ҳозирча “Тошкент метрополитени” балансига қабул қилинмаган бўлиб, барча техник ва қабул қилиш жараёнлари якунлангачгина улар корхона тасарруфига ўтказилиши режалаштирилган.

 

Шунингдек, ҳар бир пандус ёнида ундан фойдаланиш тартиби бўйича йўриқномалар ўрнатилаётгани маълум қилинган.