Исроилдаги ўзбекистонликлар огоҳлантирилди
Ўзбекистоннинг Исроилдаги элчихонаси фуқароларга тезкор эҳтиёт чораларини кўришни тавсия қилди.
Исроилдаги хавфсизлик вазияти кескинлашиши мумкинлиги муносабати билан Ўзбекистоннинг ушбу мамлакатдаги элчихонаси ватандошларга эҳтиёткорликни кучайтириш бўйича мурожаат билан чиқди.
Дипломатик ваколатхона Исроилда истиқомат қилаётган ёки вақтинча бўлиб турган барча Ўзбекистон фуқароларини мамлакат Фронт орти қўмондонлиги томонидан берилаётган кўрсатмаларга қатъий риоя этишга чақирган.
Элчихона тавсияларига кўра, фуқаролар доимо ҳимояланган жойларга яқин ҳудудларда бўлишлари, ҳаво ҳужуми ҳақида сигнал ёки сирена янграган тақдирда зудлик билан бошпанага киришлари лозим. Шунингдек, расмий рухсат берилмагунча ҳимояланган жойларни тарк этмаслик ҳамда фавқулодда вазиятларга оид расмий ахборотларни мунтазам кузатиб бориш тавсия этилган.
Маълум қилинишича, зарурат туғилганда Ўзбекистон фуқаролари элчихонанинг навбатчилик ва тезкор алоқа рақамлари орқали мурожаат қилишлари мумкин.
