Ўзбекистонликлар 5 ойда соғлиқни сақлаш хизматларига 9,1 трлн сўм сарфлади

2026 йилнинг январь–май ойларида Ўзбекистонда соғлиқни сақлаш соҳасида кўрсатилган хизматлар ҳажми 9,1 триллион сўмни ташкил этди. Бу ҳақда Миллий статистика қўмитаси маълум қилди.

 

Қайд этилишича, мазкур кўрсаткич ўтган йилнинг мос даврига нисбатан 14,7 фоизга ошган.

 

Соғлиқни сақлаш хизматлари таркибида 16,8 фоизи тиббий амалиёт ва стоматология хизматлари, 20 фоизи шифохона муассасалари хизматлари, 63,2 фоизи эса бошқа турдаги хизматлар ҳиссасига тўғри келган.

 

Ҳудудлар кесимида энг юқори кўрсаткич Тошкент шаҳрида қайд этилган бўлиб, бу ерда соғлиқни сақлаш хизматлари ҳажми 4,2 триллион сўмни ташкил этган. Кейинги ўринларда Тошкент вилояти (862,1 млрд сўм), Самарқанд вилояти (694,1 млрд сўм), Фарғона вилояти (593 млрд сўм) ва Андижон вилояти (428,9 млрд сўм) жойлашган.

 

Шунингдек, Наманган вилоятида 415 млрд сўмлик, Бухоро вилоятида 353,9 млрд сўмлик, Хоразм вилоятида 335,9 млрд сўмлик, Қашқадарё вилоятида 332,7 млрд сўмлик, Сурхондарё вилоятида 238,4 млрд сўмлик, Жиззах вилоятида 221,3 млрд сўмлик, Сирдарё вилоятида 169,7 млрд сўмлик, Қорақалпоғистон Республикасида 158,6 млрд сўмлик ҳамда Навоий вилоятида 157,9 млрд сўмлик соғлиқни сақлаш хизматлари кўрсатилган.