Президент Шавкат Мирзиёевнинг Қатарга ташрифи кутилмоқда
Ўзбекистон раҳбарининг ташрифи собиқ амирнинг вафоти муносабати билан ўтказиладиган таъзия маросимларида иштирок этиш мақсадида режалаштирилмоқда.
Президент Шавкат Мирзиёев яқин кунларда Қатар Давлатининг собиқ амири Шайх Ҳамад бин Халифа Ол Соний вафоти муносабати билан таъзия билдириш мақсадида Доҳа шаҳрига ташриф буюриши кутилмоқда.
Қатарнинг собиқ амири, мамлакатнинг замонавий тараққиётига асос солган давлат арбобларидан бири Шайх Ҳамад бин Халифа Ол Соний 74 ёшида вафот этди. Маълум қилинишича, у 12 июль куни ҳаётдан кўз юмган.
Собиқ амирнинг вафоти муносабати билан Қатарда 13 июлдан бошлаб тўрт кунлик миллий мотам эълон қилинган. Ушбу даврда давлат идоралари ва жамоат ташкилотлари фаолияти тўхтатилади, мамлакат бўйлаб давлат байроқлари ярим устунга туширилади.
Аввалроқ Ўзбекистон Президенти Қатар Давлати амири Шайх Тамим бин Ҳамад Ол Сонийга отаси — собиқ амир Шайх Ҳамад бин Халифа Ол Соний вафоти муносабати билан ҳамдардлик йўллаган эди.
