Ўзбекистонда ҳаво ҳарорати 48 даражагача кўтарилиши кутилмоқда
18–20 июль кунлари мамлакатга жанубдан жуда иссиқ ҳаво оқимлари кириб келиши давом этади.
«Ўзгидромет» Ўзбекистон ҳудудида аномал иссиқ об-ҳаво сақланиб қолиши ва айрим ҳудудларда ҳаво ҳарорати 48 даражагача кўтарилиши мумкинлиги ҳақида огоҳлантирди.
Маълум қилинишича, 18–20 июль кунлари мамлакат ҳудудига жанубдан жуда иссиқ ҳаво оқимлари кириб келиши давом этади. Республиканинг аксарият ҳудудларида ҳаво ҳарорати 43–45 даража, жанубий ва чўл ҳудудларида эса айрим жойларда 46–48 даражагача кўтарилиши прогноз қилинмоқда.
Шунингдек, республика бўйича шамол тезлиги 13–18 м/с, айрим ҳудудларда эса 20–22 м/с гача кучайиши, баъзи жойларда чанг-тўзон кузатилиши мумкин.
Аввал хабар қилинганидек, мамлакат ҳудудига 13 июлдан бошлаб жанубдан кириб келган иссиқ ҳаво оқимлари фонида электр энергияси истеъмоли тарихий рекорд даражага етди. Жазирама сабаб айрим ҳудудларда мактабгача таълим ташкилотлари фаолияти вақтинча тўхтатилди, Сурхондарё ва Қашқадарё вилоятларида оғир юк автомобиллари ҳаракатига вақтинчалик чекловлар жорий этилди.
Шунингдек, Меҳнат инспекцияси иш берувчиларга жазирама шароитида очиқ ҳавода олиб бориладиган ишларни куннинг энг иссиқ вақтида қисқартириш ёки тўхтатиш, ходимларни ичимлик суви, сояли дам олиш жойлари ҳамда иссиқдан ҳимояловчи махсус кийимлар билан таъминлаш зарурлигини эслатган.
