Ўзбекистонда айрим талабалар университет дипломини 3 йилда олиши мумкин
9-синф битирувчилари мактаб, академик лицей ёки техникумда икки йил таҳсил олиб, кейинги уч йилни маҳаллий ёки хорижий ҳамкор олийгоҳда давом эттириши мумкин бўлади.
Ўзбекистонда маҳаллий ва хорижий университетлар билан интеграциялашган янги таълим дастурлари жорий этилади. Бу ҳақда Президент Шавкат Мирзиёевга таништирилган тақдимотда маълум қилинди.
Тақдимотда мактаб, академик лицей, техникум ва олий таълим ўртасидаги узвийликни таъминлайдиган "2+3", "1+2", "2+1", "1+3", "2+2" ва "3+1" каби интеграциялашган таълим моделлари кўриб чиқилди.
Унга кўра, 9-синф битирувчилари мактаб, академик лицей ёки техникумда икки йил таҳсил олиб, кейинги уч йилни маҳаллий ёки хорижий ҳамкор олийгоҳда давом эттириши мумкин бўлади. Техникум битирувчиларига эса таълимни қисқартирилган дастур асосида университетда давом эттириш имконияти яратилади.
Шунингдек, интеграциялашган таълим дастурларини тиббиёт, энергетика, санъат ва қишлоқ хўжалиги каби устувор йўналишларда ҳам жорий этиш режалаштирилмоқда.
Халқаро малакалар ва баҳолаш марказига интеграциялашган дастурларни нуфузли ТОП-100 олийгоҳлар академик талабларига мослаштириш, улар билан “1+3” ва “2+2” шаклидаги дастурларни ишлаб чиқиш вазифаси юклатилди.
Марказ ҳузурида хорижий экспертлардан иборат доимий ишчи гуруҳ ташкил этилади. У 2027 йил якунига қадар етакчи хорижий университетлар дипломини берадиган камида иккита таълим дастури марказини ишга тушириши белгиланган.
Бундан ташқари, "Эл-юрт умиди" жамғармаси стипендия дастури ҳам янги тизимга мослаштирилади. Эндиликда у Интеграциялашган дастурлар олий мактаби ҳамда бошқа маҳаллий олийгоҳлардаги интеграциялашган таълим йўналишларини ҳам қамраб олади.
Дунёнинг нуфузли университетларига шартли қабул қилинган ёшларнинг Ўзбекистондаги олийгоҳларда биринчи курс ёки Foundation дастурида ўқиш харажатларини қоплаш механизми жорий этилади. Бу уларга таълимни Ўзбекистонда бошлаб, кейинчалик хориждаги олийгоҳда давом эттириш имконини беради.
