Аномал иссиқ тез ёрдам чақириқларини кескин оширмади — ССВ
Жазирама кузатилган сўнгги тўрт кун давомида республика бўйича 166 мингдан ортиқ чақириқ келиб тушган.
Соғлиқни сақлаш вазирлиги маълумотларига кўра, мамлакатда кузатилаётган аномал иссиқ об-ҳаво шароитига қарамай, тез тиббий ёрдам хизматига келиб тушаётган чақириқлар сонида кескин ўсиш қайд этилмади.
Республика тез тиббий ёрдам маркази директори Абдувоитжон Ғафуровнинг маълум қилишича, иссиқ ҳавода юрак-қон томир, нафас йўллари ва қандли диабет каби сурункали касалликларга чалинганлар, шунингдек, кексалар, ҳомиладор аёллар ҳамда болалар хавф гуруҳига киради. Шу боис мазкур тоифадаги фуқаролар саломатлигини мунтазам назорат қилиш муҳим аҳамият касб этади.
Қайд этилишича, аномал иссиқ кузатилган сўнгги тўрт кун давомида республика бўйича «103» хизматига жами 166 минг 726 та чақириқ келиб тушган. Барча мурожаатлар белгиланган тартибда қабул қилиниб, беморларга ўз вақтида тез тиббий ёрдам кўрсатилган.
Вазирликка кўра, 9–12 июль кунлари билан таққослаганда, жазирама даврида мурожаатлар сонида сезиларли ўсиш кузатилмаган. Бу ҳолат аҳолига оммавий ахборот воситалари ва ижтимоий тармоқлар орқали иссиқ об-ҳавода амал қилиниши лозим бўлган эҳтиёт чоралари юзасидан берилган тавсиялар самара бергани билан изоҳланмоқда.
Мутахассислар фуқароларга куннинг энг иссиқ вақтларида заруратсиз ташқарига чиқмаслик, етарли миқдорда сув истеъмол қилиш, ёғли ва шўр таомларни чеклаб, енгил ҳазм бўладиган овқатларни истеъмол қилишни тавсия этди.
