“Райҳон” миллий таомлар ресторани эгаси 8 йилга қамалди
У Жиноят кодексининг иккита моддаси бўйича жавобгарликка тортилган.
Наманган вилояти Поп туманида кўриб чиқилган жиноят иши бўйича “Райхон оилавий миллий таомлари” таъсисчиси ҳамда яна олти нафар шахсга нисбатан суд ҳукми эълон қилинди. Бу ҳақда Олий суд матбуот котиби Азиз Абидов маълум қилди.
Жиноят ишлари бўйича Поп туман судида 1977 йилда туғилган, аввал судланмаган О.И. ҳамда яна олти нафар судланувчига оид жиноят иши кўриб чиқилган.
Суд ҳукмига кўра, барча 7 нафар судланувчи Жиноят кодексининг 167-моддаси (ўзлаштириш ёки растрата йўли билан талон-торож қилиш), 209-моддаси (мансаб сохтакорлиги), 227-моддаси (ҳужжатлар ва бошқа расмий белгиларни ноқонуний эгаллаш ёки яшириш) ҳамда 228-моддаси (ҳужжатларни қалбакилаштириш ва улардан фойдаланиш) тегишли бандларида назарда тутилган жиноятларни содир этганликда айбдор деб топилган.
Суд ҳукмига асосан, О.И.га 8 йил муддатга озодликдан маҳрум қилиш жазоси тайинланди. Жиноят кодексининг 62-моддасига мувофиқ, қамоқда сақланган муддати ҳисобга олиниб, жазо муддати 7 йил 11 ой 28 кун этиб белгиланди.
Қолган олти нафар судланувчига ҳам содир этган жиноятларининг оғирлиги ва иштироки даражасидан келиб чиқиб, турли муддатларга озодликдан маҳрум қилиш жазолари тайинланди.
Шунингдек, жиноят иши доирасида етказилган моддий зарарни судланувчилардан солидар тартибда ундириш белгиланди.
Маълум қилинишича, биринчи инстанция суди ҳукми устидан қонунчиликда белгиланган тартиб ва муддатларда Наманган вилоят судининг апелляция ёки кассация инстанциясига шикоят ёки протест келтирилиши мумкин.
