Жиззахда уч нафар вояга етмаган қиз ҳовузда чўкиб, вафот этди
Ҳолат юзасидан терговга қадар текширув олиб борилмоқда.
Жиззах вилояти Мирзачўл туманида уч нафар вояга етмаган қизнинг сунъий ҳовузда чўкиб вафот этгани юзасидан терговга қадар текширув бошланди. Бу ҳақда Бош прокуратура ахборот хизмати раҳбари Ҳаёт Шамсутдиновга таяниб, "Дарё" хабар берди.
Қайд этилишича, ҳодиса 17 июль куни соат 13:00 атрофида туманнинг “Пахтазор” маҳалласида жойлашган фермер хўжалиги ҳудудида содир бўлган. Томчилатиб суғориш тизими учун қазилган сунъий ҳовузга чўмилиш мақсадида тушган уч нафар қиз чўкиб кетган. Уларнинг икки нафари 17, яна бири эса 15 ёшда бўлган.
Марҳумаларнинг ўлим сабабини аниқлаш мақсадида суд-тиббий экспертизаси тайинланган. Дастлабки хулосага кўра, уларнинг ўлимига юқори нафас йўлларининг сув билан тўсилиши оқибатида юзага келган механик асфиксия сабаб бўлган.
Ҳозирда мазкур ҳолат юзасидан Мирзачўл тумани прокуратураси томонидан терговга қадар текширув ҳаракатлари олиб борилмоқда.
Сўнгги ойларда республиканинг турли ҳудудларида сув ҳавзаларида чўкиш билан боғлиқ фожиали ҳодисалар содир бўлмоқда. Хусусан, Навоий вилоятининг Кармана туманида Зарафшон дарёсига чўкиб кетган уч нафар фуқаронинг жасади қидирув-қутқарув ишлари давомида 10 июль куни топилганди. Тошкентда Миллий гвардия ходими каналда чўкаётган аёлни қутқаришга уриниб, ҳалок бўлганди. Самарқанд вилоятининг Оқдарё туманида 42 ёшли фуқаро Қорадарё дарёсига тушиб кетгани оқибатида бедарак йўқолганди. Наманганда 18 ёшли, Бухорода 17 ёшли йигитлар ҳам сувда чўкиб, ҳалок бўлганди. Июнь ойи бошида Фарғона вилоятида эса фермер хўжалигидаги мембранали сув ҳавзасида ҳам бир киши чўкиш оқибатида вафот этганди.
