Buxoroda 17 yoshli yigit kanalda cho‘kib halok bo‘ldi
Marhumning jasadi qidiruv ishlari natijasida bir kundan so‘ng suvdan olib chiqilgan.
Buxoro viloyatining Kogon tumanida kanalda cho‘milayotgan 17 yoshli fuqaro suvga cho‘kib halok bo‘ldi. Bu haqda viloyat Favqulodda vaziyatlar boshqarmasi ma’lum qildi.
Qayd etilishicha, 27-iyun kuni soat 14:50 da “112” tizimi orqali 2009-yilda tug‘ilgan fuqaroning Kogon tumani “Sorg‘un” MFY hududidan oqib o‘tuvchi Shohrud kanalida cho‘milish vaqtida suvga cho‘kib ketgani haqida xabar kelib tushgan.
Ma’lumotlarga ko‘ra, hodisa kengligi 18–20 metr, chuqurligi esa 7–8 metr bo‘lgan kanalda sodir bo‘lgan.
Voqea joyida Buxoro viloyati Favqulodda vaziyatlar boshqarmasi qutqaruvchilari hamda mahalliy fuqarolar ishtirokida qidiruv-qutqaruv ishlari olib borilgan. Natijada marhumning jasadi 28-iyun kuni soat 16:40 da topilib, suvdan olib chiqilgan.
Hozirda hodisa yuzasidan tegishli tashkilotlar tomonidan tergovga qadar tekshiruv ishlari olib borilmoqda.
Eslatib o‘tamiz, avvalroq Toshkent viloyatining Bo‘stonliq tumanida ham ikki nafar bola kanalga tushib ketishi oqibatida halok bo‘lgani haqida xabar berilgandi.
