Бахтиёр Иноқов Сурхондарё вилояти ИИБ бошлиғи этиб тайинланди

Подполковник Бахтиёр Иноқов Сурхондарё вилояти Ички ишлар бошқармаси бошлиғи этиб тайинланди. Бу ҳақда халқ депутатлари Сурхондарё вилояти Кенгашининг навбатдан ташқари сессиясида маълум қилинди.

 

Сессияда ички ишлар вазири, генерал-лейтенант Азиз Ташпулатов, вилоят ҳокими Улуғбек Қосимов, халқ депутатлари Кенгаши аъзолари, мутасадди идоралар раҳбарлари, ҳамкор ташкилотлар масъуллари, шаҳар ва туманлар жамоатчилик фаоллари ҳамда ҳуқуқни муҳофаза қилувчи органлар раҳбарлари иштирок этди.

 

Ташкилий масала доирасида Ички ишлар вазирининг тегишли буйруғига асосан, Ички ишлар вазирлиги Академияси магистратура босқичи битирувчиси Бахтиёр Иноқов вилоят ИИБ бошлиғи этиб тайинлангани билдирилди.

 

Сессияда Сурхондарёдаги криминоген вазият, жиноятчиликни жиловлаш бўйича амалга оширилаётган ишлар ва мавжуд муаммолар таҳлил қилинди. Шунингдек, маҳаллаларда хавфсиз муҳитни шакллантириш ва профилактика ишларини кучайтиришга қаратилган вазифалар муҳокама қилинди.

 

Қайд этилишича, жорий йилнинг ҳисобот даврида вилоятдаги 723 та маҳалланинг 528 тасида, яъни 73 фоизида бирорта ҳам жиноят содир этилмаган. Ходимларнинг ташаббуси билан аниқланган жиноятлар сони эса 40 фоизга яхшиланган.

 

Бироқ вилоятдаги 28 та маҳалла “қизил” тоифада қолаётгани танқид қилинди. Ушбу ҳудудларда жиноятчиликка сабаб бўлаётган омилларни манзилли аниқлаш ва бартараф этиш зарурлиги таъкидланди.

 

Янги тайинланган раҳбар олдига жиноятчиликка қарши курашиш самарадорлигини ошириш, ҳар бир маҳаллада хавфсизликни таъминлаш, аҳоли билан яқин мулоқотни йўлга қўйиш ҳамда фуқароларнинг мурожаатларидан келиб чиқаётган муаммоларни чуқур ўрганиб, уларга ечим топиш вазифалари қўйилди.

 

Шунингдек, фуқароларнинг ички ишлар органларига бўлган ишончини мустаҳкамлаш, туман ва шаҳар ИИБ раҳбарларининг маҳаллалар кесимидаги иш самарадорлигини ошириш бўйича топшириқлар берилди.

 

Сессия якунида вилоятда осойишталикни мустаҳкамлаш, жамоат тартибини сақлаш ва аҳоли хавфсизлигини таъминлашга қаратилган навбатдаги чора-тадбирлар белгиланди.

 

21 август куни Тимур Камалитдинович Исмоилов Ўзбекистон Республикаси ички ишлар вазирининг биринчи ўринбосари — Жамоат хавфсизлиги департаменти бошлиғи лавозимига тайинланиб, Сурхондарё вилояти Ички ишлар бошқармаси бошлиғи лавозимидан озод этилганди.