Timur Ismoilov IIV vazirining birinchi o‘rinbosari etib tayinlandi
U bunga qadar Surxondaryo viloyati IIB boshlig‘i lavozimida faoliyat yuritgan.
O‘zbekiston Prezidentining tegishli qaroriga muvofiq, polkovnik Timur Kamalitdinovich Ismoilov O‘zbekiston Respublikasi ichki ishlar vazirining birinchi o‘rinbosari — Jamoat xavfsizligi departamenti boshlig‘i lavozimiga tayinlandi.
Shu munosabat bilan u Surxondaryo viloyati Ichki ishlar boshqarmasi boshlig‘i lavozimidan ozod etildi.
Timur Ismoilov 1983-yilda Qoraqalpog‘iston Respublikasi To‘rtko‘l tumanida tug‘ilgan. U ichki ishlar organlari tizimida turli mas’ul va rahbarlik lavozimlarida faoliyat yuritgan.
Jumladan, Timur Ismoilov IIV Terrorizm va ekstremizmga qarshi kurashish bosh boshqarmasi boshlig‘i lavozimida ham xizmat qilgan. So‘nggi tayinloviga qadar esa Surxondaryo viloyati IIB boshlig‘i sifatida faoliyat olib borgan.
Yangi lavozimida unga jamoat xavfsizligini ta’minlash, huquqbuzarliklar profilaktikasi va jinoyatchilikning barvaqt oldini olish tizimini yanada takomillashtirish bo‘yicha istiqbolli vazifalar yuklatilgan.
