Қозоғистонда ЙТҲ оқибатида 3 нафар Ўзбекистон фуқароси ҳалок бўлди
Ҳозирда уларни Ватанга олиб келиш чоралари кўрилмоқда.
2026 йил 22 август куни соат 06:47 да Қозоғистон Республикасининг Қизилорда вилоятида оғир йўл-транспорт ҳодисасида 3 нафар Ўзбекистон фуқароси ҳалок бўлди. Бу ҳақда ФВВ матбуот хизмати хабар берди.
Маълум қилинишича, KAZ06 давлат аҳамиятидаги «Қорабутак–Қизилорда–Чимкент» автомобиль йўлининг 1831–1836-километрларида, Бирказан тумани ҳудудида «Nexiа-2» ва «Kamaz» русумли автомобиллар тўқнашган.
ЙТҲ оқибатида «Nexiа-2» автомобили салонида бўлган 3 нафар Ўзбекистон фуқароси воқеа жойида ҳалок бўлган.
Ҳозирда Фавқулодда вазиятлар вазирлиги томонидан масъул вазирлик ва идоралар билан ҳамкорликда ишчи гуруҳ тузилиб, ҳалок бўлган фуқароларнинг жасадларини Ватанга олиб келиш ҳамда уларнинг оила аъзоларига зарур ёрдам кўрсатиш бўйича тегишли чоралар кўрилмоқда.
Шунингдек, Фавқулодда вазиятлар вазирлиги масъул ходимлари Қозоғистонлик ҳамкасблари билан доимий алоқада бўлиб, ҳодисанинг келиб чиқиш сабабларини ўрганиш юзасидан ҳамкорлик қилмоқда.
