Янги Тошкент тараққиёт марказига айланади — Президент
Мустақиллик байрами Янги Тошкентда нишонланаётгани тантана шукуҳини янада ошираётгани таъкидланди.
Президент Шавкат Мирзиёев Ўзбекистон Республикаси давлат мустақиллигининг 35 йиллигига бағишланган тантанали маросимдаги нутқида халқимизни байрам билан самимий табриклаб, мамлакатнинг энг улуғ байрами Янги Тошкентда нишонланаётгани тантана шукуҳини янада ошираётганини таъкидлади.
Қайд этилишича, келгусида илм-фан, таълим ва маданият марказига айланиши кўзда тутилган Янги Тошкентда куни кеча Янги Ўзбекистон университети, Низомий номидаги Ўзбекистон Миллий педагогика университети ҳамда Ўзбекистон миллий кутубхонасининг янги бинолари фойдаланишга топширилди.
Шунингдек, тантанали маросим доирасида очиладиган фаввора дунёдаги энг баланд мусиқали фаввора сифатида “Гиннесснинг рекордлар китоби”дан жой олгани таъкидланди.
“Бир неча юз йиллик орзулар рўёбга чиқаётган ушбу бетакрор маконда бутун халқимиз билан ҳали яна кўплаб қувончли ва тарихий воқеаларга гувоҳ бўламиз. Аминманки, Янги Тошкент пойтахтимизнинг кўркига кўрк қўшиб, биз барпо этаётган Янги Ўзбекистоннинг куч-қудратини намоён этадиган чинакам тараққиёт марказига айланади”, – деди Президент.
