Рақобат қўмитаси интернет ва рақамли хизматлар платформаларини ўрганмоқда
Ўрганишларда айрим платформаларда тарифлар, нархлар, хизмат кўрсатиш шартлари ва оммавий оферта тўлиқ жойлаштирилмагани аниқланган.
Рақобат қўмитаси стриминг, интернет ва рақамли телевидение хизматларини кўрсатувчи ташкилотларнинг мобил иловалари ва веб-сайтларини ўрганишни бошлади. 2026 йилда телекоммуникация хизматлари бўйича истеъмолчилар мурожаатлари сони ўтган йилнинг мос даврига нисбатан икки баробарга ошиб, 1000 тадан ортган.
Текширувларда платформаларда тарифлар ва нархлар, хизмат кўрсатиш шартлари, оммавий оферта ҳамда бошқа зарур маълумотлар тўлиқ жойлаштирилмагани аниқланган.
Шунингдек, айрим оператор ва провайдерларнинг платформаларида маълумотлар давлат тилида тақдим этилмаётгани ҳам қайд этилган.
Қўмита ҳозирда ушбу хизматларни кўрсатувчи ташкилотларнинг очиқ платформаларини истеъмолчилар учун зарур ахборотларни тақдим этиш ҳамда амалдаги қонунчилик талабларига мувофиқлиги нуқтайи назаридан ўрганмоқда.
Хизмат кўрсатувчи ташкилотлардан мобил илова ва веб-сайтларидаги маълумотларни тўлиқ тақдим этиш ҳамда уларни қонунчилик талабларига мувофиқлаштириш талаб қилинган.
Қўмита ўрганиш якунлари бўйича қўшимча маълумот берилишини билдирган. Истеъмолчилар ўз таклифларини info@raqobat.gov.uz ва consumer@antimon.gov.uz электрон манзилларига юбориши мумкин.
