Халқаро қидирув ва ҳибс: Ўзбекистонда жинсий жиноятда гумонланган эркак Россияда қўлга олинди

 

Россиянинг Астрахан вилоятида Ўзбекистонда 16 ёшга тўлмаган шахс билан жинсий алоқа қилишда гумонланиб, халқаро қидирувга берилган хорижий фуқаро қўлга олинди. Бу ҳақда Россия Ички ишлар вазирлигининг Астрахан вилояти бўйича матбуот хизмати хабар берди.

 

Маълум қилинишича, 2004 йилда туғилган эркак Россиядан чиқиб кетиш учун «Караўзек» назорат-ўтказиш пункти орқали ўтишга уринган вақтида ушланган. Астрахан полицияси унинг қўлга олингани ҳақида Андижон вилояти Ички ишлар бошқармасига хабар берган.

 

Ҳозирда гумонланувчи тергов ҳибсхонасига жойлаштирилган. У Ўзбекистонга экстрадиция қилинишини кутмоқда.

 

Хабарга кўра, март ойида унга нисбатан Ўзбекистон Жиноят кодексининг 128-моддаси 3-қисми «а» банди — 16 ёшга тўлмаган шахс билан жинсий алоқа қилиш бўйича жиноят иши қўзғатилган. Эркакка нисбатан сиртдан қамоққа олиш эҳтиёт чораси қўлланган.

 

Миграция хизмати ходимлари маълумотлар базасини текшириш давомида эркакнинг Россияда ноқонуний бўлиб турганини аниқлаган. У бир неча ой давомида Волгоград вилоятидаги қурилиш майдонида ишлаган.

 

Россияда бўлиш қоидаларини бузганлиги учун у Маъмурий ҳуқуқбузарликлар кодексининг 18.8-мoддacи 1.1-қисми бўйича ҳам жавобгарликка тортилган.

 

Гумонланувчини қўлга олиш операциясида миграция хизмати ходимлари, Россия Ички ишлар вазирлигининг Красноярск тумани бўлими жиноят қидирув ходимлари ҳамда Россия Федерал хавфсизлик хизматининг Қалмоғистон Республикаси ва Астрахан вилояти бўйича чегара бошқармаси ходимлари иштирок этган.