Самарқандда болалар фаровонлигига бағишланган Бутунжаҳон саммити ўтказилади
Саммитда глобал муаммоларнинг болалар ҳаётига таъсири муҳокама қилинади.
2026 йил 21–22 октябрь кунлари Самарқанд шаҳрида “Болалар фаровонлигига инвестиция: келажак авлодлар учун барқарор ва адолатли тараққиёт сари” мавзусида Бутунжаҳон саммити бўлиб ўтади.
Тадбирда 100 дан ортиқ мамлакатдан сиёсий етакчилар, вазирлар, халқаро ташкилотлар ва экспертлар, бизнес ҳамжамияти, фуқаролик жамияти, академик доиралар вакиллари, шунингдек, болалар ва ўсмирлар иштирок этиши кутилмоқда.
Саммитда можаролар, иқлим ўзгариши, иқтисодий беқарорлик ва ижтимоий тенгсизлик каби глобал муаммоларнинг болалар ҳаётига таъсири муҳокама қилинади.
Тадбир кун тартибидан болалар манфаатларини кўзлаган ижтимоий ҳимоя тизимини ривожлантириш, болаларни ҳимоя қилиш ва уларга комплекс кўмак кўрсатиш, барқарор ва қулай соғлиқни сақлаш тизимини шакллантириш, болалар саратонига қарши кураш, эрта болалик ривожи ҳамда инклюзив таълим бўйича ҳамкорликни кучайтириш масалалари ўрин олади.
Саммит доирасида II халқаро болалар онкологияси конгрессини ўтказиш ҳам режалаштирилган.
Тадбир якунида болалар фаровонлигига инвестиция қилиш бўйича Самарқанд декларацияси қабул қилиниши кўзда тутилган. Ҳужжат болалар манфаатларини таъминлаш борасидаги аниқ чоралар ва халқаро ҳамкорликни кучайтиришга қаратилади.
Бутунжаҳон саммити 21–22 октябрь кунлари Самарқанд шаҳрида бўлиб ўтади.
