Йўловчилар тўла автобус ағдарилди: Жиззахдаги ҳодиса тафсилотлари
Ҳодиса оқибатида жабрланганларга тиббий ёрдам кўрсатилди, ҳалок бўлганлар йўқ.
Жиззах вилоятининг Шароф Рашидов туманида юк машинаси билан тўқнашув оқибатида йўловчилар бўлган автобус ағдарилди.
Вилоят ЙҲХБ матбуот хизматининг маълум қилишича, ҳодиса 11 сентябрь куни соат 08:30 ларда М-39 «Тошкент—Термиз» автомобиль йўлининг Шароф Рашидов тумани ҳудудидан ўтувчи 986-километрида содир бўлган.
Қайд этилишича, «Yutong» русумли автобус йўлнинг белгиланган жойидан қайрилаётган вақтида қарама-қарши йўналишда ҳаракатланаётган «Shacman» русумли юк машинаси билан тўқнашган. Тўқнашув оқибатида автобус ағдарилган.
Ҳодиса оқибатида ҳалок бўлганлар қайд этилмаган. Автобусдаги айрим йўловчиларга биринчи тиббий ёрдам кўрсатилган.
Ҳодиса юзасидан белгиланган тартибда суриштирув ишлари олиб борилмоқда.
Эслатиб ўтамиз, аввалроқ Тошкент вилоятининг Чирчиқ шаҳрида «Howo» русумли юк машинасининг ярим тиркамаси хонадон деворига бориб урилгани ҳақида хабар берилган эди.
