Тошкентга келаси йили 10 млрд доллар инвестиция жалб қилинади

Келаси йили Тошкент шаҳрига 10 миллиард доллар инвестиция жалб қилиш ва 150–200 мингта юқори даромадли доимий иш ўрни яратиш бўйича аниқ режа ишлаб чиқилади. Бу ҳақда Президент Шавкат Мирзиёев раислигидаги Тошкент шаҳрини ижтимоий-иқтисодий ривожлантириш масалаларига бағишланган видеоселектор йиғилишида маълум қилинди.

 

Йиғилишда пойтахт туманлари ва маҳаллаларининг мавжуд имкониятларини тўлиқ ишга солиш, қўшимча қиймат яратиш, инвестицияларни кўпайтириш ва юқори даромадли иш ўринларини ташкил этишга янгича ёндашиш зарурлиги таъкидланди.

 

Қайд этилишича, Тошкентнинг ҳар бир тумани ўз салоҳиятидан келиб чиқиб, муайян йўналишларга ихтисослашиши керак.

 

Жумладан, Сергели, Янгиҳаёт ва Бектемир туманларида Тошкентга кириб келаётган юкларни саралаш, қадоқлаш, тақсимлаш ва етказиб беришга ихтисослашган йирик логистика мажмуаларини ташкил этиш имконияти мавжуд.

 

Шайхонтоҳур, Мирзо Улуғбек, Миробод, Юнусобод ва Яккасарой туманларида замонавий бизнес ва молиявий марказларни кўпайтириш орқали 2 миллиард долларлик капитал бозорини шакллантириш ҳамда 20–25 мингта юқори даромадли иш ўрни яратиш мумкинлиги қайд этилди.

 

Олмазор, Чилонзор ва Учтепа туманларида эса таълим, тиббиёт, савдо ва сервис соҳаларига камида 1 миллиард доллар инвестиция жалб қилиш ва 15–20 мингта иш ўрни яратиш салоҳияти бор.

 

Йиғилишда жорий йилда пойтахтнинг 12 та тумани бўйича 9 миллиард доллар инвестиция жалб қилиш режалаштирилгани ҳам қайд этилди. Айрим ҳудудларда белгиланган кўрсаткичларга эришиш учун ишларни жадаллаштириш зарурлиги кўрсатиб ўтилди.

 

Инвесторларнинг муаммоларини идорама-идора юрмасдан, бевосита жойида ҳал қилиш учун янги иш тизими жорий этилади. Республика ва шаҳар даражасидаги масъуллар ҳар ҳафта туманларга чиқиб, тадбиркор ва инвесторлар билан учрашади ҳамда уларнинг муаммоларини тезкор ҳал қилади.

 

Юқори даражада ечим талаб қиладиган масалалар юзасидан шу куннинг ўзида асосланган таклифлар тайёрланиб, Президент Администрациясига киритилади. Мазкур тартиб йил охиригача алоҳида назоратда бўлади.