Эронга қарши уруш: АҚШ Конгресси Эронга қарши ҳарбий амалиётларни тўхтатишга чақирди
АҚШ Вакиллар палатаси ҳарбий амалиётларни Конгресс розилигисиз давом эттиришни чеклашга чақирувчи резолюцияни 220 овоз билан маъқуллади.
АҚШ Вакиллар палатаси президент Доналд Трамп маъмуриятининг Эронга қарши ҳарбий амалиётларини Конгресснинг махсус розилигисиз давом эттиришни чеклашга қаратилган резолюцияни маъқуллади. Бу ҳақда АP хабар берди.
Резолюция учун 220 нафар конгрессмен овоз берган, 204 нафари қарши чиққан. Ҳужжатни барча демократлар ҳамда етти нафар республикачи қўллаб-қувватлаган. Бу Вакиллар палатасининг Эронга қарши ҳарбий ҳаракатларни чеклаш бўйича учинчи овоз бериши бўлган.
Резолюция Уруш ваколатлари тўғрисидаги қонунга асосланган бўлиб, Конгресс томонидан алоҳида рухсат берилмаган тақдирда АҚШ ҳарбий кучларининг Эронга қарши жанговар амалиётларда иштирокини тўхтатишни назарда тутади.
АҚШ Конституциясига кўра, уруш эълон қилиш ваколати Конгрессга тегишли. Шу билан бирга, президент бош қўмондон сифатида айрим ҳарбий операцияларни амалга ошириш ваколатига эга. Уруш ваколатлари тўғрисидаги қонун эса президентнинг ҳарбий кучлардан фойдаланиш ваколатларини Конгресс назорати билан чеклашга қаратилган.
Бироқ аввалги шунга ўхшаш резолюциялар каби мазкур ҳужжат ҳам президентга юборилмаган. АP маълумотига кўра, Трамп маъмурияти ушбу ташаббусга қарши чиқмоқда.
