Багажсиз учган йўловчилар: 99 та багаж Истанбулда қолиб кетди
«Centrum Air» йўловчиларининг 100 га яқин багажи Истанбулда қолдириб кетилди.
Ижтимоий тармоқларда Истанбулдан Фарғонага учган йўловчиларнинг 99 та багажи қолдириб кетилгани ҳақида хабарлар тарқалди. Ҳолатга «Centrum Air» авиакомпанияси расмий муносабат билдирди.
Қайд этилишича, C6 316 Истанбул — Фарғона рейсида ҳаво кемасига юк ортишда эксплуатацион чекловлар жорий этилган. Қарор парвозлар хавфсизлиги талабларига қатъий мувофиқ равишда қабул қилинган. Шу сабабли 99 дона багаж ушбу рейс билан манзилга етказилмаган.
«Ушбу вазият таъсир қилган барча йўловчилардан чин дилдан узр сўраймиз. Багажсиз учиб келиш қанчалик ноқулай ва ёқимсиз эканини тушунамиз», дейилади хабарда.
Авиакомпания багажларни имкон қадар тезроқ етказиб бериш учун барча саъй-ҳаракатларни амалга оширмоқда. Дастлабки маълумотларга кўра, багажлар 5 октябрь куни соат 22:00 да Фарғона аэропортига етказилади.
